Kryeministri i Kosovës, Albin Kurti, e ka uruar Talat Xhaferin për marrjen e postit të kryeministrit në Maqedoninë e Veriut, duke shkruar se orientimi euroatlantik e partneriteti me Perëndimin është ajo që dëshirohet.
Kurti ka shkruar në Facebook të dielën se Maqedonia e Veriut duhet të jetë “sa më larg Moskës e fijeve të saj”, e për promovimin e vlerave të bashkëjetesës dhe luftës ndaj diskriminimit, “do të vazhdojmë rrugën e bashkëpunimit ndërqeveritar”.
“Një Maqedoni e Veriut me orientim të fortë euroatlantik, partnere e Prishtinës dhe e perëndimit dhe sa më larg Moskës e fijeve të saj, një Maqedoni e Veriut që promovon vlerat e bashkëjetesës dhe lufton diskriminimin etnik, është ajo që dëshirojmë. Për këto synime e për plot bashkëpunime të tjera, jam i sigurt se do të vazhdojmë rrugën e bashkëpunimit ndërqeveritar edhe me homologun z.Xhaferi, ashtu siç ka ndodhur edhe me paraardhësin e tij, z. Kovaçevski, të cilin e përgëzoj për vlerat që reflektoi gjatë drejtimit të tij”, ka thënë Kurti.
Sipas kryeministrit Kurti, miqësia dhe bashkërendimi për projekte të përbashkëta të jenë shënjuese të dy qeverive.
