Kryetari i Gjilanit ka porositur për mobilizim, para zgjedhjeve të së dielës që mbahen në Serbi. Ai bëri të ditur se do të organizohet transport falas për shqiptarët e Luginës me të drejtë vote. E, kryeministri Albin Kurti ka thënë se bashkimi i partive shqiptare në Preshevë, Medvegjë dhe Bujanoc është dëshmi edhe për pluralizëm politik, edhe për unitet
Ai ka porositur për mobilizim, për të vazhduar betejën “për të vërtetën e shqiptarëve të Luginës së Preshevës”.
“Komuna e Gjilanit ka siguruar transportin për të gjithë ju që jetoni e veproni në Gjilan, për në zgjedhjet e jashtëzakonshme parlamentare të 17 dhjetorit në Serbi. Për më shumë informata, ju lutemi të drejtoheni te Zyra për Preshevë, Medvegjë dhe Bujanoc në kuadër të Komunës së Gjilanit”, ka bërë të ditur Hyseni. “Të mobilizohemi për të vazhduar betejën për të vërtetën e shqiptarëve të Luginës së Preshevës”.
Gjilani është një nga komunat e Kosovës më të afërta me Luginën, e ku janë zhvendosur shumë qytetarë nga Presheva, Medvegja dhe Bujanoci. Po kështu, dhjetëra mijëra të zhvendosur janë edhe në Prishtinë dhe në Fushë-Kosovë.
Kryeministri i Kosovës, Albin Kurti, ka thënë se bashkimi i partive shqiptare në të tria këto komuna, për zgjedhjet në Serbi, është dëshmi edhe për pluralizëm politik, edhe për unitet.
Kurti ka qenë të mërkurën i ftuar dhe folës në tubimin e mbajtur në mbështetje të listës “Beteja politike e shqiptarëve vazhdon – Shaip Kamberi”, për zgjedhjet e jashtëzakonshme të 17 dhjetorit në Serbi.
Duke folur për koalicionin e përbërë nga pesë parti shqiptare, Partia për Veprim Demokratik, Partia Demokratike Shqiptare, Lëvizja e Progresit Demokratik, Unioni Demokratik Shqiptar dhe Aleanca për Luginën, që garojnë së bashku në një listë, kryeministri Kurti ka thënë se ai përbëhet me figurat që bartin integritet të lartë moral dhe patriotik, njerëz që shquhen për aktivitetin e tyre politik për të drejtat dhe liritë e shqiptarëve në Luginë.
“Ky bashkim i shqiptarëve në Preshevë, Medvegjë dhe Bujanoc në këto zgjedhje është dëshmi që mund të jemi edhe për pluralizëm politik, edhe unitet kombëtar, mund të jemi edhe patriotë, edhe demokratë, dhe se beteja e këtillë politike është e drejtë për nga karakteri i saj dhe se e gëzon mbështetjen tonë”, është cituar kryeministri Kurti në një komunikatë të Qeverisë.
Për Shaip Kamberin, deputet i vetëm shqiptar në Kuvendin e Serbisë, kryeministri Kurti ka thënë se është një zë i fuqishëm i reciprocitetit.
Ai i ftoi të gjithë që të bashkohen e ta mbështesin Kamberin dhe listën e përbashkët për t’iu “kundërvënë regjimit autoritar e antishqiptar në Serbi”, dhe “për t’iu dalë në mbrojtje dhe avancim të të drejtave dhe lirive për komunitetin tonë shqiptar që jeton në atje”.