Kompleksi turistik “Rajska Banja” që dje (e martë) u mor nën kontrollin e Agjencisë Kosovare të Privatizimit, deri vonë ka qenë strehë e terroristëve të pjesëtarëve të të ashtuquajturës ‘Mbrojtja Civile’, kurse drejtori i saj, Marko Saviq, ka qenë njëri nga pjesëmarrësit e sulmit terrorist të 24 shtatorit në fshatin Banjskë të Zveçanit.

Këtë konstatim Kosovapress e ka mësuar nga të dhënat e komunitetit të inteligjencës në Kosovë.

Kosovapress ka siguruar fotografi të Marko Saviqit, i cili shihet së bashku me terroristët Vladimir Radivojeviq – Mami (bashkëpunëtor i afërt i Milan Radoicic) dhe Uglesa Jarediq (shefi i truprojave të Radoiçiq). Radivojeviq, së bashku me Radoiçiq dhe 18 të tjerë, kanë hyrë në “red notice” të Interpolit. Fotografia është realizuar me 24 shtator 2023, ditën kur Serbia kishte organizuar sulm terrorist në fshatin Banjskë.

Kompleksi “Rajska Banja”, dikur ka qenë një banjë termale e Kosovës, kurse organet ilegale të Serbisë kanë provuar që ta përvetësojnë duke u përpjekur që të investojnë, gjoja në bashkëpunim me kishën ortodokse.

Mirëpo, sipas informacioneve që ka siguruar Kosovapress, pikërisht në bodrumin e këtij kompleksi, më 25 shtator, është gjendur një automjet i tipit “Opel” me armatim, i cili është konfiskuar nga Policia e Kosovës. Hapësirën e këtij kompleksi, serbët e kishin shfrytëzuar edhe për pozicionimin ndaj sulmit terrorist ndaj Policisë së Kosovës më 24 shtator, kur u vra pjesëtari i Policisë Afrim Bunjaku.