I akuzuar për maltretim të shqiptarëve gjatë luftës, ish-gardiani serb Dragisha Milenkoviq është deklaruar i pafajshëm për akuzat për krime lufte. Ndërkaq, ka pranuar fajësinë për armëmbajtje pa leje.

Ai akuzohet se gjatë luftës në Kosovë, si gardian i Burgut të Prishtinës dhe Lipjanit, bashkë me zyrtarë të tjerë të burgjeve, ka maltretuar të burgosur shqiptarë.

Të gjitha palët janë pajtuar me pranimin e fajësisë për armëmbajtje pa leje që e ka bërë i akuzuari.

Gjyqtari Kujtim Krasniqi, ka thënë se shpallja e aktgjykimit për akuzën për mbajtje në kontroll ose posedim të paautorizuar të armëve, pezullohet deri në përfundimin e shqyrtimit gjyqësor.

Në gjykimin që ka nisur të mërkurën prokurori special Atdhe Dema tha se Milenkoviq bashkë më zyrtarë të tjerë kanë torturuar në mënyrë çnjerëzore me shkopa gome, shufra gome, rrymë elektrike, grushte dhe shkelma duke u shkaktuar edhe alivanosje të burgosurve shqiptarë.