Familjarët e të riut që u vra para dy javësh pasi u rrah me shkop të bejsbollit thanë se besojnë në sistemin e drejtësisë.

“Kjo ka ndodhur, e shpresojë nuk i ndodhë askujt, rinia nuk është e sigurt në Kosovë. Shpresojë që drejtësia e sjell rastin në vend”, ka thënë Latif Fejzullahu, axha i viktimës.

E përderisa familjarët thanë se besojnë në sistemin e drejtësisë, disa nga pjesëmarrësit thanë se institucionet e drejtësisë duhet të japin përgjegjësi pasi njëri nga të dyshuarit ka të kaluar penale.

“Nuk është i mitur ai, nëse nëntë raste i ka bë ai moti është dashtë me qenë i izoluar dhe jo kjo të ndodhë…për ditë ndodhin, rrahin njerëz pas shpinës, me bejsbollë, ka krime, ka drogirasha ka droga në shkolla nuk i marrin ata, duhet të largohet droga prej shkollave si në Podujevë si në Prishtinë. Përderisa droga nuk hiqet nga shkollat, ne asgjë nuk presim nga kjo rini e jona”, ka thënë Afërdita Ilazi, qytetare.

“Çfarë drejtësie, ku ka drejtësi këtu. Prokurorët që janë milionerë e kriminelë që bashkëpunojnë me krimin, po prisni drejtësi. Edhe ky reagim është shumë i vogël. Nuk e di se si munden prindërit ose atje të rinjtë kriminelë që çohen nëpër xhamia, manipulohen, u shpërlahet truri nuk reagojnë për një bashkëmoshatarë të tyre, me dal dhe me ju tregu që nuk bën të ushtrojnë dhunë dhe nuk duhet të kryejnë vrasje”, ka deklaruar Pajazit Jashari, qytetar.

18-vjeçari ka vdekur në Emergjencës e QKUK-së disa ditë pasi ishte rrahur.

Policia fillimisht e raportoi vrasje në tentativë dhe therje me thikë, e në Emergjencë konstatuan vdekjen e tij nga lëndimet në kokën e viktimës, të marra nga shkopi i bejsbollit. Për këtë raportim Inspektorati Policor i Kosovës ka iniciuar hetim.

Një ditë para mbajtjes së protestës, në raportin e Policisë u raportua edhe për një vrasje në tentativë në fshatin Surkish të Podujevës. Sipas Policisë, viktima është dërguar në QKUK si pasojë e lëndimeve të rënda trupore, ndërsa rasti është ende nën hetime.