Sot, Radiotelevizioni Publik i Kosovës raportoi se ishte planifikuar një atentat ndaj kryeministrit Albin Kurti gjatë kohës sa po qëndronte në Shkup.
Por, për këtë pretendim të RTK’së për ekzistim të planit për atentat ndaj Kurtit, nuk janë informuar as u.d. Kryeprokurori i shtetit Besim Kelmendi, e as Kryeprokurori i Prokurorisë Speciale të Republikës së Kosovës (PSRK), Blerim Isufaj.
“Për momentin në Zyrën tonë nuk ka ndonjë veprim në lidhje me këtë lajm”, ka thënë për “Betimi për Drejtësi”, Kryeprokurori Besim Kelmendi.
“Jo nuk kam ndonjë informatë”, ka thënë në anën tjetër Kryeprokurori Isufaj.
Lidhur me raportimet për atentat ndaj tij, ka folur edhe vetë kryeministri Kurti, i cili ka thënë se nuk është ndjerë i kërcënuar. Ndonëse, sipas tij ka pasur shumë kërcënime nga individë dhe struktura që i kanë rrënjët në Beogradin zyrtar.
“Unë kam mësuar që ka shumë kërcënime nga individë e struktura të cilët i kanë rrënjët në Beogradin zyrtar. Por unë sa erdha nga Shkupi, nuk jam ndjerë i rrezikuar, veç se kam parë që kishte shumë forca policore që u kujdesen për këtë mbledhjen që e mbajtëm në Shkup me Partitë Socialdemokrate”, është shprehur Kurti.
RTK ka raportuar se institucionet e sigurisë kanë siguruar të dhëna se nga Serbia, ka përpjekje për vrasjen e Kurtit, derisa ai po qëndronte në Shkup pas mbledhjes së Këshillit të Sigurimit të OKB-së.
Në anën tjetër, Ministria e Punëve të Brendshme të Maqedonisë së Veriut, kanë mohuar se ka pasur një tentim për atentat të tillë dhe se siguria e Kryeministrit Kurti është organizuar sipas rregullave të përcaktuara dhe vlerësimeve të sigurisë.