Në katër vjetët e shkuar vazhdimisht ka rënë numri i përfituesve të pensionit për personat parapalegjikë e tetraplegjikë. Por, nga marsi e deri në tetor, ky numër është rritur për 450. Shkakun e rritjes nuk e kanë shpjeguar në Ministrinë e Financave. Në shoqatën “Handikos” thonë se kjo mund të jetë nga vlerësimi më objektiv, e në Komisionin parlamentar për të drejtat e njeriut hodhën dyshime mbi vlerësimin
Në Ministrinë e Financave nuk dhanë shpjegime se si ka ndodhur rritja.
“Të dhënat vazhdimisht nxirren nga databaza e pensioneve sikundër edhe tani. Për më tepër shih e-mailin e mëposhtëm të zyrtarit të IT-së”, ka thënë në një përgjigje të shkruar Skender Asllani, nga Departamenti i Pensioneve në Ministrinë e Financave, Punës dhe Transfereve.
Por edhe në emailin që iu prezantua KOHËS mungoi sqarimi.
“Numri i përfituesve në mars dhe në këtë muaj është ashtu siç e kemi cekur. Arsyen pse është rritur ky numër, unë nuk e di. Raporti është dhënë sipas të dhënave në databazë”, thuhet në email.
Aktualisht 2.953 qytetarë kanë statusin e personave paraplegjikë dhe tetraplegjikë me të drejtë për kompensim.
Por, deri sivjet, vazhdimisht është ulur numri i personave në kategorinë e parë, të cilëve ligji ua njeh të drejtën e mbështetjes me 75 euro për barna dhe pagesa prej 150 eurosh për shoqëruesin.
Në shoqatën “Handikos” thanë se rritja e numrit të personave paraplegjikë dhe tetraplegjikë mund të jetë rezultat i reflektimit në vlerësim, nga ana e Komisionit mjekësor të Ministrisë së Financave, puna e të cilit është kritikuar prej kohësh.
“Nuk do ta kisha quajtur rritje, por ndoshta do ta kisha quajtur vlerësim me të drejtë që u bëhet personave paraplegjikë dhe tetraplegjikë dhe ndoshta kjo mund të jetë edhe si shkak i presionit nga ana jonë, apo ndoshta edhe presion i vetë Ministrisë dhe sekretarit ndaj komisioneve që personat paraplegjikë dhe tetraplegjikë të vlerësohen më drejt”, ka thënë Afrim Maliqi, drejtor i shoqatës “Handikos”.
E kryetarja e Komisionit parlamentar për të drejta të njeriut, Duda Balje, ka shprehur dyshime në punën e Komisionit të Ministrisë.
“Kemi informata prej terrenit, prej komunave, se edhe personat të cilët nuk janë me aftësi të kufizuara, janë duke marrë këto shtesa. Domethënë, padrejtësi kudo, në secilën komunë”, ka thënë Balje. “Ne kemi kërkuar ndryshim të personave që janë brenda këtij komisioni, sepse janë më shumë se 4-5 vjet dhe ne jemi duke shikuar çdo ditë çka janë duke bërë, por komisioni nuk e ka prekur asnjë person deri më tash”.
KOHA ka raportuar për raste të ndryshme të vlerësimeve jo të drejta nga Komisioni mjekësor i Ministrisë së Financave dhe për mohimin e së drejtës për kujdestar personal për personat që komisioni brenda QKUK-së i ka kategorizuar në grup të parë.
