Familja e Liridona Ademajt, gruas që u vra më 29 nëntor në Prishtinë, ka kërkuar një takim urgjent me Prokurorinë, për të marrë informacion mbi hetimet dhe zhvillimet lidhur me rastin.
Këtë e ka komentuar avokati, Arbër Jashari, i cili ka thënë se kërkesa e familjes ka ndodhur, pasi që është “terrorizuar” me informata edhe spekulative dhe “kjo ua ka rritë shqetësimin duke menduar se çka po bëhet”.
“Mendoj që prokurori i ka njoftuar për çështjet kryesore. Por këtu çështja është se është bërë shumë zhurmë, dhe ajo familje ditëve të fundit ka qenë e “terrorizuar” me shumë informata, ndoshta edhe të karakterit spekulativ”, tha avokati i Familjes Ademaj në RTV Dukagjini.
“Dhe kjo ua ka rritur shqetësimin duke menduar se çka po bëhet. Në këtë fazë është mirë të njoftohet, nëse është marrë deklaratë e ndonjërit prej të pandehurve ose është marrë në pyetje ndonjë dëshmitarë”, ka shtuar avokati Jashari.
Avokati nuk beson që prokuroria ka avancuar me veprime të rëndësishme sa që do të ishte e domosdoshme ta njoftojë familjen.
“Mendoj që Prokuroria mund ta njoftojë thjesht që është marrë kjo provë ose ajo, deri në atë sa ta ruaj konfidicialitetin e procedurës penale. Mirëpo mendoj që për këtë fazë nuk pa pasur edhe ndonjë zhvillim, thjesht nuk është kryer ndonjë hap procedural, është caktuar masa e paraburgimit ata akoma nuk e kanë kryer 30 ditshin e parë”, ka deklaruar tutje Jashari.
