Vuçiq gjatë konferencë për media ka thënë po ashtu se kryeministri i Kosovës, “Albin Kurti s’dëshiron të zbatojë asnjë marrëveshje dhe se ai do që Serbia t’i zbatojë ato që ka thënë”.

“Serbia do të zbatojë gjithçka që ka thënë, pra në mënyrë të denjë, në mënyrë korrekte, por presim po ashtu që të formohet AKS-ja. Sa i përket gjërave të ndryshme që kemi bërë tashmë, nga letërnjoftimet e deri te targat, e çdo gjë tjetër, gjithmonë jemi përpjekur që të arrijmë një kompromis. Ne do të bëjmë maksimumin në të ardhmen. Dhe ne gjithmonë kemi thënë se jemi për një Ballkan të hapur, se nuk kemi asnjë problem me këtë, por gjithmonë do të vendosim ‘disclaimer’, që do t’ua bëjnë të qartë të gjithëve se Serbia s’e njeh pavarësinë e Kosovës. Po e përsëris se Serbia nuk e njeh pavarësinë e Kosovës dhe nuk do ta njohë pavarësinë e Kosovës”, tha Vuçiq, raporton “RTS”.

Ai ka insistuar se Serbia nuk do të pranojë detyrim për ta mbështetur Kosovën në anëtarësim në organizata ndërkombëtare.

“As në afat të gjatë dhe as në atë të shkurtër, s’do të pranojmë detyrim të tillë. Pres që në janar të hapet një polemikë e gjerë dhe sigurisht se nuk do të jenë gjëra të thjeshta”, ka thënë Vuçiq.

Vuçiq po ashtu ka folur për sulmin terrorist në Banjskë më 24 shtator ku u vra zyrtari policor Afrim Bunjaku. Në atë sulm u vranë edhe tre prej sulmuesve.

“Prishtina vazhdon t’i fshehë gjetjet e autopsisë së Stefan Nedeljkoviqit, Igor Milenkoviqit dhe Bojan Mijailoviqit. Ne i kemi lutur ata pafundësisht. Për ne, këta janë njerëz. Dhe ne do të vazhdojmë të kërkojmë të hetojmë se si dhe pse u vranë në gjakftohtësi”, tha Vuçiq.